VISITAMOS O TEATRO E O CAFÉ MODERNO DE PONTEVEDRA.

O mércores 27 de febreiro o alumnado de 1º e 2º curso de Educación Primaria acudiu ao Auditorio de Afundación para desfrutar dun concerto teatralizado do grupo Mamá Cabra. Finalizaron esta saída coa visita ao Café Moderno. 

Mamá Cabra, coa obra de teatro “Eu cociño, ti cociñas”, sorprendeu e enganchou ao alumnado aos seus pegadizos sons e a unha historia onde a cociña foi a protagonista.
Os nenos e nenas do C.E.I.P. San Martiño, cantaron e coñeceron receitas que poderán elaborar nas súas casas coa axuda dos seus familiares. 

Unha proposta innovadora, onde a alimentación saudable se converte no medio perfecto para traballar aspectos curriculares. 

Despois, visitaron o Café Moderno, onde coñeceron algo mais da historia de Pontevedra e dos personaxes que frecuentaban este emblemático lugar, como Perfecto Feijóo, Castelao, ou o violinista Manuel Quiroga. O alumnado descubriu coas trasnadas do Ravachol a importancia do Café Moderno na vida cultural de principios do século XX, lugar onde se facían os faladoiros.

Finalmente, decoraron uns antefaces do Ravachol que levaron de recordo desta interesante visita-obradoiro. 

Facer click aquí para ver máis fotografías.

SABEDES POR ONDE ESTIVO ORBIL O LUNS 25 DE FEBREIRO?

 Visitando o  C.E.I. P. San Martiño!

Que  ben o pasamos dando apertas a Orbil, a mascota  do Salón  do Libro Infantil e Xuvenil de Pontevedra, un lobo  moi divertido e agarimoso que le moitos contos. Así, a espera para a  nosa visita o Salón  faise  máis  levadeira! 

Esta visita de Orbil está enmarcada dentro de diferentes actividades que estamos a levar a cabo no centro co motivo do Salón, tendo como eixo central "a revolución das mulleres".

Fixeron  moi  boas migas!

Para ver máis fotografías facer click aquí.

Moitas grazas amigo! Vémonos pronto no Salón do Libro!

LIBRE O MEU PENSAMENTO!

A Asociación de Escritores e Escritoras en Lingua Galega (AELG), convidaron á comunidade educativa á implicación de forma activa na celebración do Día de Rosalía de Castro que celebra o nome e a obra da poeta maior de Galicia, chave mestra da nosa literatura e da nosa conciencia como pobo.

O 24 de febreiro, é o día fixado no Calendario do Libro e da Lectura como aniversario do nacemento da autora. Así, dende o C.E.I.P. San Martiño, queremos conmemorar un ano máis o Día de Rosalía de Castro. 

Por este motivo, o venres 22 realizamos no colexio un acto con música e lecturas de textos da escritora galega.

Nos días previos realizamos entre todo o alumnado do centro este mural titulado "O XARDÍN DE ROSALÍA". Os nenos e nenas traballaron diferentes textos da autora galega, reflexionando sobre a vixencia do amplo abano de inxustizas sociais, incluída a situación da lingua galega, presentes na obra de Rosalía de Castro. Para facer este mural, o alumnado escribiu diversas poesías de Rosalía nas flores, para compoñer así este xardín tan fermoso exposto na entrada do noso centro! 

O venres, realizamos unha Mani-FESTA-acción simbólica arredor de tres poemas escollidos polo alumnado. 

Os poemas recitados foron os seguintes: 

3ª curso de Educación Primaria: "Na Catedral".

4° curso de Educación Primaria: "Miña casiña, meu lar".

6° curso de Educación Primaira: "Campanas de Bastabales".

Para finalizar esta homenaxe a nosa poeta galega, cantamos todos xuntos "Adiós ríos, adiós fontes" interpretada polo compositor e cantante Amancio Prada. Facendo click aquí podedes ver toda a reportaxe fotográfica.

A continuación deixámosvos un vídeo da homenaxe de Rosalía. Esperamos que vos guste!

UNHA VISITA MOI ESPECIAL NO CEIP SAN MARTIÑO.

Este mércores 20 de febreiro, o alumnado de 3º, 4º, 5º e 6º de Educación Primaria recibiu unha visita moi especial: o escritor e ilustrador ANXO FARIÑA! 

Anxo Fariña visitou o noso colexio da man do Faro de Vigo. O obxectivo principal da visita foi achegar ao alumnado a súa obra e ensinarlles a súa faceta de ilustrador e escritor. Os nenos e nenas traballaran na clase previamente coas distintas coleccións como "Megatoxos" ou "Pelelliños", investigando sobre a súa biografía. 

Faloulles de forma moi próxima sobre os seus comezos como escritor, facendo unha demostración do fácil que pode ser ilustrar unha historia partindo de algo tan sinxelo como unha caixa de cartón. Contoulles que para él, o importante é que os seus debuxos expresen sentimentos, de aí a súa sinxeleza.

Moitas veces, ao finalizar a lectura dunha obra, xórdennos dúbidas e curiosidades que soamente o propio autor podería desvelar. O alumnado tivo a gran oportunidade de resolvelas nunha rolda de preguntas!

Despois desta agradable charla, Anxo Fariña asinoulles os libros para que o alumnado levase un bonito recordo deste encontro. Así, moitos nenos e nenas quedaron con ganas de ler máis obras deste autor, facendo desta maneira, que a Bibliotca cumpra co seu papel de promover o gusto pola lectura. 

Que ben o pasamos! Volve pronto, Anxo!

Para ver máis fotos, facede click aquí. 

CONVERTÉMONOS EN PEREGRINOS!

O alumnado de Educación Infantil do C.E.I.P. San Martiño visitou o mércores 20 de febreiro o albergue de peregrinos Virxe Peregrina de Pontevedra, facendo previamente un anaco do Camiño  Portugués. 

Esta saída está contextualizada nun proxecto anual que se está levando a cabo no centro sobre o Camiño de Santiago. 

Comezamos a saída no parque infantil de Campolongo, onde merendaron e se divertiron xogando todos xuntos.

Despois de repoñer forzas, fixeron un anaco do Camiño Portugués. 

Ao chegar ao albergue recibiunos Tino Lores (Presidente da Asociación de Amigos do Camiño Portugués) e unha hospitaleira. Comezaron explicándolles os requisitos para poder aloxarse no albergue, selaron as credenciais de peregrino e inscribíronse no libro de rexistro do albergue, asinando eles mesmos. Despois, visualizaron un vídeo da nosa cidade por onde pasa o Camiño.

O alumnado descubriu o valioso que resulta para o peregrino este aloxamento, e os servizos que lles ofrecen a través dunha visita guiada polas intalacións: comedor, cociña, oficina, lavandería, aseos, habitacións…Incluso  fixeron que durmían no albergue! 

Grazas ao persoal do albergue por esta inesquecible visita, que era para moitos nenos e nenas a súa primeira excursión!

Agardamos con ilusión a visita de Tino Lores ao noso colexio para seguir aprendendo máis cousas sobre o Camiño de  Santiago.

Para ver toda a reportaxe fotográfica pinchade aquí.

ENCONTRO CON BEGOÑA VILA

O luns 11 de febreiro o alumnado de 3º e 6º de Educación Primaria participou nun encontro con Begoña Vila, co obxectivo de celebrar o Día da Muller e a Nena na Ciencia. Begoña Vila, é unha enxeñeira astrofísica que traballa na NASA, e é a encargada de controlar o telescopio espacial James Webb, o sucesor do "Hubble" que será enviado ao espacio no vindeiro 2019.

A comunicación con Begoña Vila foi por videoconferencia dende Washington, nunha pantalla no Salón de actos do Pazo da Cultura.

Entre outras cousas, fíxolles reflexionar, a través dunha gráfica, sobre a realidade dos traballos que desempeñan as mulleres (baixo porcentaxe de altos cargos). Explicoulles a súa labor como enxeñeira nun centro de voo espacial, e do telescopio James Webb no que está a traballar.

Finalizaron este encontro cunha rolda de preguntas que o alumnado tiña preparadas.

O alumnado foi resolvendo moitas das dúbidas e curiosidades da man de Begoña. Sen lugar a dúbidas, unha experiencia gratificante para todos e cada un deles!

Pinchando aquí podedes visualizar todas as fotografías.

OBRADOIROS DE HABILIDADES SOCIAIS NO C.E.I.P. SAN MARTIÑO

O CEIP San Martiño ofrecerá a partir deste mes obradoiros de habilidades sociais para 4º, 5º e 6º de Educación Primaria. Son organizados coa colaboración do  Concello de Pontevedra e realizaranse en cinco sesións, ao longo dos vindeiros tres meses. Son impartidas por un grupo de pedagogos do Concello.

Este pasado mércores día 6, impartiuse un deles en 6º de Educación Primaria: comezou o obradoiro cunha dinámica de grupo, para incidir na realidade de que, aínda que parece que nos coñecemos pola convivencia diaria, pode que algúns aspectos de cada un de nós pasen desapercibidos para o resto. Resultou todo un éxito, ás veces sorprendíanse eles mesmos coas respostas, pois non sempre foron quen de atinar co nome da compañeira ou compañeiro que estaba detrás desas actividades.

A segunda dinámica que propuxo a pedagoga foi, se cabe, aínda máis interesante, pois pretendía demostrar como non se chega a producir unha comunicación plena se a situación non é propicia. Foi realmente divertido! Decatáronse do complicado que pode resultar comunicar ou expresar algo e conseguir ser realmente comprendido.

O alumnado agarda con ilusión aprender novas habilidades nos próximos talleres!! 

Para acceder as fotografías pinchade aquí: OBRADOIROS.

DÍA ESCOLAR DA NON VIOLENCIA E DA PAZ!

O mércores 30 de xaneiro celebramos todos xuntos o Día Escolar pola Paz e a Non Violencia.

Pretendemos fomentar no alumnado coñecementos e actitudes que nos conduzan cara a sociedades máis tolerantes e empáticas, onde primen valores de respecto, cooperación, solidariedade, igualdade entre mulleres e homes, desenvolvemento dos dereitos humanos, entre outros. 

Por iso, estes días fixemos unha serie de actividades, como son: elaborar pombas e marcapáxinas de contos relacionados coa Paz, decorar as portas das aulas, aprender poemas de Gloria Fuertes, etc.

O propio día da Paz, fixemos Contacontos nas aulas, demos "abrazos gratis" e cantamos todos xuntos unha canción. 

En cada aula contouse un conto, e nos días previos, profesorado e alumnado decoraron as súas portas con imaxes do mesmo. Cada neno e nena, foi visitando as diferentes portas das aulas e escollendo o conto que quería escoitar o día da Paz.

Os contos a elixir eran os seguintes: 

   4º Educación Infantil: De que cor é un bico?

   5º Educación Infantil: Hoy no juegas.

   6º Educación Infantil: Imagine.

   1º Educación Primaria: Jaime de cristal.

   2º Educación Primaria: La guerra de los números. 

   3º Educación Primaria: El enemigo.

   4º Educación Primaria: Malala. Temos dereitos.

   5º Educación Primaria: El hombre de la luna.

   6º Educación Primaria: A visita dos troles. 

   Aula de inglés: El Rey que quería un amigo.

Tanto o profesorado como o alumnado gozou moito desta actividade acollendo a alumnos e alumnas de diferentes idades e compartindo un momento agradable da lectura nun día especial. Sen dúbida, unha gran experiencia para todos!

Para finalizar este día, cantamos todos xuntos no salón de actos a canción "Hecho con tus sueños" de Maldita  Nerea. 

A continuación podedes ver un vídeo das diferentes actividades e da canción.

Para ver toda a reportaxe fotográfica, fadede click na palabra PAZ.

O día da Paz, ten que estar cada día no centro, durante todo o curso, por iso seguiremos traballando cada día para logralo!!!

O ALUMNADO DE 6º DE EDUCACIÓN PRIMARIA VISITA O IES TORRENTE BALLESTER

 VISITA AO IES TORRENTE BALLESTER

A transición entre as distintas etapas educativas debe ser un proceso, non un cambio. Nesta transición, o alumnado experimenta medos, dúbidas, desorientación… Así, para que esta adaptación á nova situación se desenvolva de forma positiva, é necesaria unha colaboración, coordinación e comunicación dos centros de Educación Primaira cos Institutos do municipio, sendo primordial o apoio e implicación das familias. 

Para afrontar estes cambios, o alumnado de 6º de Educación Primaria, fixo unha visita ao IES Torrente Ballester. Queremos contarvos esta experiencia! 

Ao entrar no IES, recibiunos o director, David Castro, e acompañounos á primeira aula que íamos visitar, a aula de música. 

Aquí, puidemos tocar varios instrumentos de percusión e o piano. O alumnado do IES sorprendeunos cunha sinxela melodía, onde posteriormente algún alumno e alumna do centro animouse a participar. 

Neste vídeo podedes escoitar un anaco da canción:

Continuamos coa visita aos laboratorios de física e química e a aula de tecnoloxía, onde puidemos ver os proxectos que realiza o alumnado dos diferentes cursos do instituto, incluso probamos o ben que funcionaban!

Despois, na aula de informática o director comentounos que o alumnado de 1°da ESO non a ía usar moito, xa que están no programa Edixgal e cada alumno e alumna ten o seu propio ordenador portátil. 

Visitamos unha das aulas de 1° da ESO, o alumnado estaba na clase de matemáticas. Tamén coñecemos o pavillón polideportivo e o salón de actos, onde atendemos ás explicacións do director e respondeu ás cuestións que inquietaban aos alumnos e alumnas sobre o funcionamento do centro.

Finalizamos esta interesante e necesaria visita na biblioteca, onde a xefa de estudos fixo unha presentación polo miúdo sobre os estudos que se imparten no instituto, incidindo nos primeiros cursos da ESO.
Queremos dar as grazas ao Instituto por un agasallo que nos fixo moita ilusión! Un conto de María Victoria Moreno, ilustrado polo alumnado do IES, para cada alumno e alumna e tamén para a biblioteca do cole! 

Antes de marchar, sacamos unha foto de grupo no exterior do centro e visitamos o patio cuberto, onde nos refuxiaremos os días de choiva.

Para ver máis fotografías, fadede click aquí.

Desde o Ceip San Martiño, queremos garantir un bo proceso de transición entre estas etapas, polo que, mantemos a comunicación entre o profesorado do centro e dos institutos. A coordinación entre ambos centros é un aspecto clave para que o noso alumnado supere con éxito a incorporación a esta nova etapa.

Coma sempre, quedamos á disposición das familias para calquera dúbida.

PLAN DIRECTOR NO CEIP SAN MARTIÑO

Este venres 25 de xaneiro, o alumnado de 5º e 6º curso de Educación Primaria participou no Plan Director impartido pola Policía Nacional. 

Este Plan, impulsado desde Delegación do Goberno en Galicia e a Alta Inspección de Educación, ofrece aos centros a posibilidade de solicitar charlas informativas sobre temáticas como o acoso escolar, violencia de xénero, novas tecnoloxías, etc. 

Desta maneira, ponse de manifesto o compromiso da Consellería e dos centros coa construción dunha sociedade tolerante e democrática.

Por este motivo, recibimos a visita dun dos policías que imparten as charlas deste Plan. O tema en concreto foi o Acoso Escolar, mais coñecido como Bullying. 

En primeiro lugar, Roberto (un dos policías) explicoulle ao alumnado, a través dunha presentación en Power Point, ideas precisas sobre o tema, dando pistas claras para que os nenos e nenas puideran identificar este tipo de situacións. O alumnado involucrouse e interactuou con Roberto, xurdindo o longo da charla multitude de cuestións que foi resolvendo puntualmente. Tamén lles falou do ciberacoso e das redes sociais. 

Para rematar, ensinoulles un vídeo dunha situación real de acoso nun centro educativo que serviu de exemplo de toda a charla. Posteriormente, xerouse un interesante debate onde todo o alumnado participou de maneira activa e interesada. 

Se queredes ver máis fotografías, pinchade aquí. 

Ademais, repartiron un tríptico a cada neno e nena con diferente información que aquí vos ensinamos.

Dende o CEIP San Martiño, queremos agradecer a implicación á Policía Nacional para dar a coñecer esta problemática actual.