FELIZ NADAL

O Equipo de profesores de Salcedoteca queremos compartir con vós esta panxoliña e desexarvos a todas as familias do colexio e aos nosos lectores un Feliz Nadal e pedir para o ano 2010 unha morea de amor, unha enchenta de cariño e un carro cargado de moita sorte para todos... ah! e non esquezades pedirlles aos Reis moitos libros para ler, para ver, para disfrutar: un libro é sempre un bo agasallo!

Consultade as nosas recomendacións de lectura, aquí mesmo no lateral do blog.

10 DE DECEMBRO: DÍA DOS DEREITOS HUMANOS



( Cartel elaborado polo IES Río Cabe de Monforte)


A nosa Biblioteca súmase á celebración do Día dos Dereitos Humanos o próxinmo 10 de decembro. Queremos reflexionar xuntos sobre a importancia da aprobación dos Dereitos Humanos para as nosas vidas e sobre todo falaremos da importancia do seu cumprimento en todos os países.

¿Queres aprender xogando cos Dereitos Humanos? Fai clic nesta imaxe:

E ESTIVEMOS CO ALCALDE...

Hoxe os nosos alumnos do 2º Ciclo visitaron as dependencias do Concello de Pontevedra e foron recibidos polo Sr. Alcalde D. Miguel Anxo Fernández Lores, que tivo a amabilidade de responder a todas as súas preguntas. Ademais tiveron a oportunidade de entregar en Rexistro unha instancia, que elaboraran entre todos na clase coas demandas para as melloras do noso centro.

Damos as grazas dende aquí a todas as persoas que dende a corporación municipal colaboraron para facer realidade esta visita, xa que estaba programada dentro do noso proxecto de Biblioteca, que este trimestre se centra no estudo da cidade.

Máis adiante outro grupo de alumnos realizará a mesma visita para dar cumprimento á programación que o noso centro realizou sobre o proxecto, antes mencionado.

AS BIBLIOTECAS ESCOLARES SON NOTICIA

Esta fin de semana a Voz de Galicia fíxose eco do traballo que a nivel de fomento da lectura se está a levar a cabo nas Bibliotecas Escolares.

Parécenos importante que un xornal de tal difusión dea a coñecer a importancia do labor que os docentes están a levar a cabo dentro dos proxectos de Biblioteca.

Destácase a Hora de Ler, a Mochila Viaxeira e outras actividades, que están en marcha dende hai algúns cursos e que se veñen promovendo dende a Asesoría de Bibliotecas Escolares da Xunta.

Para saber máis pincha en cada unha das noticias:

" GALICIA A LA CABEZA DE ESPAÑA EN FOMENTO DE LECTURA JUVENIL"

"Para este trimestre, os alumnos elixiron obras de John Steinbeck, Franz Kafka e Albert Camus"

"Un tiempo para la calma con el que desaparecen los conflictos y se mejora el clima general del centro"

"Cuatro mil bolsas con películas y libros para toda la familia circulan por la comunidad"

PRESENTACIÓN DE PDI (II PARTE)

Hoxe venres rematamos a presentación dos Proxectos das cidades cos cursos dos maiores: 4º, 5º e 6º de Primaria.

Presentaron traballos de calidade nos que nos falaron da histioria de Pontevedra, dos seus edificios máis emblemáticos, rematando os alumnos de 6º cun recorrido polas rúas de Pontevedra, que levan o nome de personaxes ilustres nados na nosa cidade.

Dende aquí felicidades aos nenos e nenas que onte e hoxe nos amosaron o resultado de tan exceletes traballos. Noraboa aos seus profesores e profesoras que dirixiron e prepararon as diferentes presentacións...: cada curso seguimos sorprendéndonos do moito que podemos aprender xuntos.

A CIDADE: PRESENTACIÓN DE PDI

Unha das tarefas máis importantes que levamos a cabo dentro dos proxectos de Biblioteca son os PDI, realizados por todos os cursos e que este ano versaron sobre to tema da cidade.

Os PDI son pequenos traballos de investigación nos que procuramos chegar a un novo coñecemento a través da búsqueda de información, acadando cada vez máis autonomía e capacidade de expresión persoal.

Hoxe xoves presentaron aos compañeiros o resultado do seu traballo, os alumnos de Ed. Infantil, 1º, 2º e 3º de Primaria.

Nestas imaxes podemos ver algúns momentos desa presentación.

25 DE NOVEMBRO: DÍA CONTRA A VIOLENCIA DE XÉNERO

As Bibiliotecas Escolares de Galicia solidarizámonos co problema da violencia de xénero no mundo e queremos facer unha pequena aportación co motivo da celebración o 25 de novembro do Día Internacional contra a violencia de xénero con este pequeno conto para os nosos nenos e nenas, que trata o tema da coeducación como base fundamental para loitar, dende os principios da nosa formación, contra a violencia de xénero.

O conto títúlase "Una feliz catástrofe" de Adela Turín. Se queres velo pincha na foto:

A FIGUEIRA DE PELOSTORTOS

Polo Samaín e como xa vén sendo habitual no centro, a Biblioteca regalounos a todos un conto de medo, escenificado por varios profesores, e que falaba de Pelostortos, un home egoísta e cruel que nunca quixo compartir cos nenos os figos da súa figueira. Ao final o inxenio e imaxinación dos nenos vence a mezquindade deste malvado personaxe.
Podedes ver neste vídeo que realmente o pasamos de medo!!!

CONTADOR, QUE ME QUERES CONTAR...?

CONTADOR, QUE ME QUERES CONTAR...? foi outra das actividades programadas para celebrar o 24 de outubro, Día das Bibliotecas e resultou ser ademais de novidosa, moi ben acollida polos nenos e nenas do centro.

Consistiu en que durante a hora de ler do pasado venres, alumnos de 4º, 5º e 6º de Primaria, convertéronse durante uns minutos en contacontos e pasaron polas aulas de infantil, 1º, 2º e 3º de primaria para levarlles algúns contos, que eles mesmos tiñan seleccionado e preparado.

A experiencia foi celebrada por todos e non descartamos volver a repetila noutra ocasión.
Para que vos fagades unha idea de como se desenvolveu, deixamos aquí estas imaxes:

24 DE OUTUBRO, DÍA DAS BIBLIOTECAS

Para nós o Día das Bibliotecas é cada día do ano, posto que ao longo de todo o curso realizamos actividades dende a Biblioteca, que nos acercan ao mundo do libro de maneira permanente e así nos sentimos sempre "enganchados" ás aventuras, ao medo, á poesía... ao mundo da lectura.

De todas formas queremos dunha maneira especial adicar o día 24 de outubro a pensar no que nos brindan as Bibliotecas á nosa formación como persoas e como alumn@s, especialmente a nosa Biblioteca de San Martiño.

Por iso este curso aínda que a pobre se atope pechada por obras, seguimos vivindo o seu espíritu lector e organizamos unhas cantas actividades, entre elas a creación dun marcapáxinas, que elaboraron tod@s @s alumn@s do centro, que se atopan expostos no pasillo inferior do centro.

Os tres que foron seleccionados de cada aula podedes velos aquí:

XA ESTAMOS CAMIÑANDO POLO 2009-10

Tarde, pero aquí estamos!!!

Dende o 10 de setembro estamos xa facendo camiño ao longo do novo curso 2009-10.

O noso desexo era darvos un saúdo de chagada no seu día, pero a realidade é que este inicio foi algo accidentado para todos, posto que comezamos coas obras no centro o día 1 de setembro e agora mesmo estamos convivindo en "pacífica coexistencia" profesores, alumnos, pais/nais e demais persoal con todo o que iso implica de incomodidades polos cambios de clase, mobiliario, acotación de espazos... todo sexa polo ben do centro e, por suposto, polos "bens" que todos esperamos logo disfrutar, acabadas as obras.

Antes de nada queremos dar a benvida aos novos alumnos e ás súas familias, cada curso aumenta significativamente a nosa matrícula: estamos satisfeitos de que o CEIP San Martiño continúe ano a ano aumentando a súa comunidade educativa.

Para este curso e como adianto podemos dicir que temos xa preparados os proxectos que enmarcarán o noso labor educativo e que se organizan dende o Equipo de Biblioteca. Coma sempre pensamos abranguer aparte do fomento da lectura, eixe básico do noso ideario de ensino, a educación documetal e a habilitación no manexo das TIC. Os temas que se elixiron para este ano son "As cidades" e "O mundo do circo".

Procuraremos tervos informados regularmente de todo canto se vaia desenvolvendo na vida do centro.

Sin máis, un saúdo afectuoso para tod@s de parte do claustro do CEIP San Martiño.

DESPEDIMOS O CURSO

Rematamos o curso coa celebración do tradicional Festival,no cal puxemos todos e todas unha enorme dose de alegría, ilusión e humor.

Neste festival quixemos compartir con toda a comnidade educativa a emoción de despedir o curso 2008/09 que remata e tamén de dicirlle adeus aos alumnos que se van.

Deixamos aquí en Salcedoteca, esta pequena reportaxe gráfica para recordar.

FELIZ VERÁN E ATA PRONTO!!!

SEMANA DOS OBRADOIROS

Este ano a Semana dos Obradoiros está dedicada á pintura, pois o proxecto de Biblitoteca, que leva por título "Lendo a través da pintura" adicouse dende o mes de febreiro a realizar un estudio sobre os pintores e as súas obras.

Agora para rematar os nosos proxectos das aulas , realizamos unha parte práctica adicada a afondar en certos artistas como Picasso, Van Gogh, Velázquez...

Moitos destes obradoiros organizáronse a través do Programa Letras Vivas, que solicitamos este ano á Consellería de Cultura.

Tamén queremos agradecer a colaboración de Mónica, nai dunha alumna de 3 anos e pintora de profesión, quen colaborou facendo varios obradoiros cos nosos alumnos.

O Programa de actividades, que se remitiu ás familias como información estes días é o seguinte:

Luns, 27 de abril: ED. INFANTIL DE 3 E 4 ANOS.
Obradoiro de Ilustración de Chus Ferrín

Martes, 28: 5º de PRIMARIA E 1º CICLO.
"Clase de pintura" a cargo de Mónica, pintora e nai dunha alumna de 3 anos.

Mércores, 29 de abril: ED. INFANTIL DE 5 ANOS E 1º DE PRIMARIA.
“Un día con Van Gogh” de Crearte ( Grupo de Animación do programa Letras Vivas)

Mércores, 29 de abril: 2º E 3º DE PRIMARIA.
“Un día con Picasso”de Crearte

Xoves, 30 de abril: 4º DE PRIMARIA.
“Un día con Velázquez” de Crearte ( Grupo de Animación do programa Letras Vivas)

Xoves, 30 de abril: 5º E 6º DE PRIMARIA.
“Un día con Leorardo da Vinci”de Crearte

Martes, 5 de maio: ED. INFANTIL E 2º CICLO
"Clase de pintura" a cargo de Mónica, pintora e nai dunha alumna de 3 anos.

Mércores, 6 de maio: ED. INFANTIL
“A palabra máxica” de Amalia Pérez (Organizado grazas ao programa Letras Vivas)

Coma sempre, aquí deixamos estas imaxes, para que vexades canto aprendemos e o ben que o pasamos:

LUNS 27 DE ABRIL: OBRADOIRO DE ILUSTRACIÓN CON CHUS FERRÍN

MARTES 28 DE ABRIL: CLASE DE PINTURA CON MÓNICA, PINTORA PROFESIONAL

MÉRCORES 29 DE ABRIL: CREARTE TRÓUXONOS "UN DÍA CON VAN GOGH" E "UN DÍA CON PICASSO"

XOVES 30 DE ABRIL: VIVIMOS "UN DÍA CON VELÁZQUEZ" GRAZAS A CREARTE

MARTES, 5 IMITAMOS AS MENINAS DE VELÁZQUEZ NO OBRADOIRO DE PINTURA

MÉRCORES, 6 XOGAMOS COA IMAXINAXIÓN NO OBRADOIRO DE AMALIA PÉREZ

GALERÍA DE IMAXES DA V SEMANA DA LECTURA

Rematamos este ano a V Semana da Lectura, o venres, 24 cunha actuación espectacular do Grupo de Teatro NI FU NI FA da Coruña, que viñeron a presentarnos a obra "Recicla Arte". Este espectáculo foi subvencionado en parte pola Consellería de Cultura e entra dentro do programa Letras Vivas.

No resto da Semana, as actuacións do alumnado e tamén a do teatro extraescolar do centro desenvolvéronse, como estaba previsto, con grande aceptación por parte do público.

Aquí deixamos esta galería de imaxes, clasificadas por días para o recordo de todos:

....................LUNS 20..............................................MARTES 21

............................

..................MÉRCORES 22 ........................................XOVES 23

...............

..................VENRES 24

V SEMANA DA LECTURA

Un ano ano máis e dentro da programación de actividades adicadas a " Abril, mes dos libros", acabamos de iniciar hoxe luns, 20 de abril a V SEMANA DA LECTURA, adicada desta vez ao tema da pintura.

Aquí presentamos o programa de actuacións, no cartel anunciador deste quinta edición que, coma sempre, esperamos que sexa do agrado de toda a comunidade educativa.


Queremos recordar que esta actividade semanal de portas abertas, na que a principal protagonista é a lectura, se atopa encadrada no II Proxecto de Biblioteca do centro, que se iniciara a finais de febreiro con outras actividades de motivación, documentación... e que ten como evento principal a celebración deste semana adicada á lectura.

Finalistas do Premio Irmandades do Libro

No diá de hoxe, 23 de marzo de 2009, recibimos a comunicación de que o Xurado dos XVIII Premios Irmandade do Libro, organizados pola Federación de Libreiros de Galicia, acordou proclamar ao noso centro como un dos finalistas na modalidade de Centros de Ensino, xunto co CEIP Quintela de Moaña e o IES Blanco Amor de Ourense. O colexio gañador determinarase na reunión que se celebrará o día 28 de marzo a celebrar en O Carballiño.

O gañador na categoría de autor foi Xabier P. Docampo e os finalistas no resto de categorías son:

Centros de ensino:

CEIP San Martiño, de Igrexa-Salcedo – Pontevedra

CEIP de Quintela - Moaña

IES Blanco Amor, de Ourense

Fomento da lectura:
Biblioteca Pública de O Porriño
Bibliotecas Públicas da Coruña
Asociación Cultural Lonxa Literaria, de Moaña

Institucións:
Casino de Santiago
Asociación Cultural IES Rosalía de Castro
Liceo Recreo Ourensán

Librarías:
Andel do Libro Galego e Portugués
Libraría Porta da Vila, de Viveiro
Libraría Paz, de Pontevedra

Mellor libro do ano 2008:
Fin de século en Palestina. Miguel Anxo Murado. Editorial Galaxia.
Festina lente. Marcos S. Calveiro. Edicións Xerais de Galicia.
O xardín das pedras flotantes. Manuel Lourenzo. Edicións Xerais de Galicia

Obra editorial do ano 2008:
As flores do mal. Ed. Galaxia.
Guía das plantas de Galicia. Ed. Xerais.
Colección rescate. Alvarellos editora.

Os nosos parabéns para todos os finalistas e en xeral para todos os que desde distintos ámbitos traballan en prol do libro e do fomento da lectura.

CO AUTOR DOS MEGATOXOS

Hoxe tivemos a sorte de recibir a visita de Anxo Fariña, autor e ilustrador do libro Os Megatoxos, editado pola Nosa terra e que tivemos a oportunidade de ler.

Os alumnos de 3º e de 4º de Primaria estiveron moi entusiasmados pola súa visita, sobre todo porque moitos deles mercaran e leran a historia deste coñecido ilustrador, que ademais agora é o autor das súas propias creacións.

Ademais de explicar como naceron parte das historias e dos personaxes da súa obra, Anxo tamén nos deleitou coa súa grande capacidade de invención e fantasía, realizando unha serie de creacións plásticas, a partir de situacións, persoas, obxectos... que se ían plantexando ao longo da charla.

Queremos agradecer dende Salcedoteca a visita de Anxo Fariña e deixar constancia cunha pequena reportaxe gráfica dos momentos máis interesantes da súa presenza aquí, en Salcedo.

VISITA DE ANXO FARIÑA

COÑECEMOS O RÍO DOS GAFOS CON VAIPOLORÍO

O CEIP Martiño participa este ano na Campaña itinerante de promoción do río dos Gafos nos colexios de Pontevedra.

Este mes de marzo corresponde a este centro a realización das diferentes actividades que a Asociación Vaipolorío, xunto coa Concellalía de Medio Ambiente do Concello de Pontevedra, teñen preparado.

Por esta razón, o martes pasado, tivo lugar no centro unha charla impartida por Gonzalo Sancho, presidente da Asociación Vaipolorío, que consistiu nun relatorio titulado “Flora e fauna do Río dos Gafos”, dirixida a toda a comunidade educativa.

Tamén se organizou unha Exposición fotográfica de imaxes dos ríos Cocho, Toxal, Tomeza e Gafos, realizadas polo fotógrafo Nelson de Fotovedra, que a Asociación Vaipolorío presenta no centro.

Por último os alumnos de 5º e 6º de Primaria realizarán proximamente un paseo didáctico pola zona rural do río Gafos na parroquia de Tomeza.

ENTROIDO INDIO

A nosa Biblioteca sumouse este ano tamén á celebración do Entroido, presentando unha sesión de información audiovisual sobre a vida e a cultura dos indios americanos.

Entendemos que cómpre deste xeito, cunha das súas funcións máis importantes, que é a de acercar o mundo da información aos seus usuarios, a poder ser dentro dun ambiente lúdico e de entretenemento.

Para máis información visitade o noso blog OÑITRAM, que é onde podedes ver con máis detalle e en imaxes a organización desta actividade.

Visita ao X Salón do Libro de Pontevedra

Salon do Libro 09

O AMOR

“ Din que o amor é cousa de parvos pero eu creo que o amor é so cousa dun bico” (Alumna de 6º)

Un ano máis todo o alumnado e profesorado do CEIP SAN MARTIÑO participamos co noso traballo “Historias de Amor” no X Salón do libro. Foi laborioso pero divertido facer este traballo; para o que lemos, escribimos e debuxamos moito. Outro día amosarémosvos o libro que fixemos, hoxe non podemos porque está na exposición do Pazo da Cultura, se queredes podédelo ir ver alí. Ademais os de 6º tamén escribiron unhas románticas declaracións de amor. .

O mellor de todo é poder ir visitar o Salón, sempre queremos ir todos. O martes 3 de febreiro fomos a metade do alumnado do noso cole.

“Fomos ao Salón do libro onde había moitas cousas interesantes. Ao chegar guiounos un monitor chamado Adrián que nos levou a un obradoiro de escrita onde fixemos unha poesía de amor . Despois volveu Adrián e levounos a explicar as cousas que había coma: esculturas de Cupido ou unha nai abrazando aos seus fillos. Logo apareceu un lobo moi bonito que se chama Orbil, e moitas cousa mais , xa ao remate gustounos moito sentarnos nunhas cadeiras que había en forma de man e ler libros, lemos un pouquiño dos Megatoxos foi xenial estar alí” (Alumnos de 4º).

“Fomos a un obradoiro de ilustración con Anxo Fariña que nos ensinou a facer monstros con letras e números. A Sabela debuxouna no encerado e despois convertémola entre todos nun feo monstro foi divertido. Tamén entramos nunhas salas marabillosas... Logo vimos os traballos dos coles, habíaos con gominolas e, a algúns facíasenos a boca auga, pero o mellor era o noso. A continuación pasamos pola exposición de Fina Casalderrey ,unha escritora de aquí , onde fixemos unha foto. Por último quedáronnos uns minutos para ler os libros que estaban nos andeis. É unha sorte poder ir . O AMOR POLOS LIBROS . ¿ Non vos preguntastes nunca se os libros teñen sentimentos?” (alumnas de 6º).

Dende aquí queremos felicitar ao Concello de Pontevedra e a Organización do Salón por permitirnos participar e gozar todos os anos desta festa dos libros e da cultura.¡¡¡Longa vida ao Salón do Libro de Pontevedra1!!!

30 DE XANEIRO: DÍA DA PAZ EN SAN MARTIÑO

Co motivo do Día da Paz programáronse entre o Equipo de Biblioteca do centro e o Equipo de Normalización Lingüística unha serie de actividades, entre as que nos gustaría destacar as lecturas, relacionadas con este tema que se leron en diferentes sesións ao longo da mañá e que foron as seguites: para Educación Infantil proxectamos na Biblioteca a historia que conta " O Libro da Paz" de Todd Parr da Editoral Serres.

Os de 1º,2º e 3º escoitaron a historia de "Los niños no quieren la guerra" de Éric Battut da Editorial Juventud e deixamos para os maiores unha historia que nos fixo reflexionar a todos, " El enemigo" de Davide Cali da Editorial SM.

Se queredes saber máis cousas acerca das activiadades que se realizaron ao longo da mañá, podedes pinchar neste enlace, que vos levará ao Blog do Equipo de Normalización do centro: Oñitram.

MOCHILAS VIAXEIRAS

Acaban de poñerse en marcha esta mesma semana, as Mochilas Viaxeiras en todos os niveis do noso centro.

Este programa, promovido pola Asesoría de Bibliotecas Escolares, ten como obxectivo acercar o mundo da lectura ao ámbito familiar e crear ademais entre a escola e as familias unha canle de comunicación a través dos libros.

As nosas mochilas van cargadas de historias, poesías, vídeos... para pequenos e grandes. Ademais presentan a particularidade de levar un CD cos traballos de investigación que levou a cabo este trimestre o alumnado dende 4 anos en diante.

Trátase de pequenos documentais que partiron do proxecto da Biblioteca, "As historias de amor", e que podedes agora atopar na mochila ou premendo nos seguintes enlaces (tede paciencia porque poden tardar un pouco en cargar): 5º e 6º de Infantil e 1º, 2º, 3º, 4º, 5º e 6º de Primaria.

Esperamos recibir os vosos comentarios, suxestións, opinións... no Caderno Viaxeiro que acompaña a cada unha das mochilas, para poder así ir mellorando a nosa oferta de lectura e que ao final consigamos entre todos unhas boas lecturas para disfrutar, compartir, contar... ! ou todo aquilo a onde nos leve a aventura de ler!

¡Que as disfrutedes!

¡FOI PREMIADO O NOSO PROXECTO LECTOR!

Acábanse de publicar recentemente no Diario Oficial de Galicia os premios á innovación educativa nos niveis non universitarios, que foran convocados en maio do 2008.

O CEIP San Martiño presentara o seu Proxecto Lector de Centro nunha das modalidades que contemplaba a Consellería de Educación nesa convocatoria e temos a satisfacción de comunicar que obtivemos un dos cinco premios que se concederon a nivel de Galicia.

Noticias coma esta supoñen unha dose de ánimo importante e axúdannos a continuar coa nosa labor docente de buscar día a día o mellor que poden dar de si os nosos alumnos. Tamén confirman que o noso traballo dentro da dinamización da lectura está no bo camiño e resulta moi gratificante saber que as actividades que se levan a cabo no centro son valoradas por unha entidade educativa, como é a Consellería.

Ademais de toda a alegría que supón este recoñecemento, non podemos esquecer que o premio vén acompañado cunha dotación económica de 1.500 euros, que se destinarán á mellora e ampliación dos fondos bibliográficos da nosa Biblioteca e para dar cumprimento aos obxectivos do Plan Lector.