Blog da Biblioteca do CEIP San Martiño

Salcedo-Pontevedra
____________________________________________________________________________________________________________________________________

sábado, 20 de decembro de 2008

Panxoliñas no Belén

Como cada ano celebramos a chegada do Nadal, cunha pequena festa arredor do Belén, cantando panxoliñas, tocando e incluso bailando...

O ambiente no centro era de festa total: houbo celebracións polas aulas, visitáronnos antigos alumnos e profesores e rematamos o trimestre coa alegría e satisfacción de ter cumprido coa primeira etapa do curso, superando os obxectivos propostos.

Agora nestas vacacións merecidas de Nadal esperamos, profesores e alumnos, cargarnos da enerxía suficiente para vir en xaneiro coa mesma ilusión de traballo e de continuar día a día superándonos e aprendendo co esforzo e todos.

Que pasedes unhas moi Boas Festas en familia e aproveitade este tempo para COMPARTIR cos vosos seres queridos o tempo, o cariño, a alegría... en definitiva, o mellor que cada un de nós leva dentro.

Aquí tedes en Salcedoteca, para o voso recordo, unha pequena testemuña gráfica deses momentos de festa que pasamos o derradeiro día do trimestre.

Panxoliñas no Belén


martes, 16 de decembro de 2008

Xa somos Premio Nacional de Bibliotecas Escolares!


A ministra de Educación, Mercedes Cabrera, e o presidente de Castela-A Mancha, José María Barreda, entregaron o pasado luns, 15 de decembro de 2008, os premios do Concurso Nacional de boas prácticas para a dinamización e innovación das bibliotecas en centros escolares, na Biblioteca Rexional de Castela-A Mancha, situada no Álcázar de Toledo.

Neste acto, o CEIP San Martiño de Salcedo foi galardoado co terceiro premio, dotado con 6.000 euros. Este premio é un recoñecemento a un proxecto que desenvolve de xeito integrado o plan de lectura, a educación documental e a formación de usuarios; entendendo a biblioteca como recurso didáctico e fonte de información e de lecer.

A comunidade educativa deste centro séntese moi satisfeita do logro conseguido, que constitúe un importante recoñecemento a un labor que se vén realizando no centro dende hai máis de seis anos.

A señora ministra agradeceu a todos os premiados o converter as bibliotecas en lugares vivos e dinámicos, capaces de atraer aos máis grandes e aos máis pequenos, conseguindo facer realidade o desexo que dende hai máis de setenta anos tiveron en España un grupo de visionarios da II República de acercar a lectura a todos e borrar deste modo as desigualdades que impedían o acceso ao mundo da cultura dunha maneira universal e democrática.

luns, 1 de decembro de 2008

PRESENTACIÓN DOS PROXECTOS DOCUMENTAIS

Presentación PDI das historias de amor.
A nosa Biblioteca propuxo este curso como primeiro proxecto:"As historias de amor". Sobre este tema o alumnado do centro realizou unha serie de Proxectos Documentais Integrados, nos cales o fío conductor era precisamente o amor, se ben, algúns deles preferiron escoller aqueles personaxes ou elementos que aparecían repetidos ao longo das historias literarias que traballaron nas aulas.

Coma cada ano, realizouse no centro unha sesión de presentación do resultado destes proxectos para todos.


As imaxes da galería deixan constancia deste evento, que este ano estivo acompañado de presentacións visuais dos traballos, empregando diferentes técnicas, para amenizar as ponencias.

sábado, 1 de novembro de 2008

Lecturas polo Samaín


O día 30 de outubro, na celebración do Samaín, a biblioteca converteuse nunha sala de exposicións, con preto dun centenar de cabazas decoradas polos rapaces e rapazas. Pero ademais, a biblioteca foi ocupada por todo tipo de seres maléficos, como bruxas, esqueletos, pantasmas, vampiros... que recibiron a visita dos asombrados alumn@s do colexio.

Durante a visita, todos os grupos foron obsequiados coa lectura dun conto de medo titulado “Bola de Manteiga”. O conto foi lido por un grupo de profesor@s, convenientemente disfrazados, e os rapaces e rapazas gozaron moitísimo coa súa lectura e cos terroríficos efectos de son que a acompañaban.

Ademais, @s alumn@s de 6º de primaria, que elaboraron un estudio sobre a tradición da Santa Compaña, plasmado nun libro con fermosísimos debuxos, leron este traballo ao resto do alumnado, xunto cun conto sobre esta tradición.

Se queredes ver máis fotos dos actos só tedes que visitar "Oñitram", o blog do Equipo de Normalización e Dinamización Lingüística. Esperamos que vos gusten!

luns, 27 de outubro de 2008

Día das Bibliotecas Escolares

Lecturas
A Asociación Internacional de Bibliotecarios Escolares, iniciou no ano 1999 a convocatoria do Día Internacional da Biblioteca Escolar, no cuarto luns do mes de outubro de cada ano, coa fin de sensibilizar á sociedade sobre a importancia da biblioteca escolar como recurso fundamental no proceso de ensino-aprendizaxe e impulsar a súa presenza na institución escolar.

É, como non podía ser doutra maneira, no CEIP San Martiño celebramos o pasado venres 24 de outubro o Día das Bibliotecas Escolares cuns actos moi especiais: @s alumn@s de 6º de primaria leron un manifesto aos seus compañeiros e varios profesores do centro agasallaron ao alumnado coa lectura do conto Paco Papán, acompañada de soporte visual e musical.

Premendo no video poderás ver un pequeno resumo dos actos. Se ves que o vídeo vai a tiróns segue estas instrucións: primeiro fai clic nel; a continuación párao no botón "pausa" e verás que na parte de abaixo aparece unha barra vermella que indica que o arquivo está cargando; por último, espera a que a barra chegue ata a metade e xa poderás ver o video enteiro dun tirón e sen paradas.


venres, 24 de outubro de 2008

Benvido Oñitram!

Hai uns días naceu OÑITRAM, o novo blog do Equipo de Normalización e Dinamización Lingüística do CEIP San Martiño. Chámase así porque Oñitan aparte de ser Martiño ao revés é tamén o nome co que os nenos bautizaron a fraga que está a carón do centro e que serviu de escenario para unha das historias que se crearon aquí, que se titulou "Os Rabichos na fraga de Oñitram" e á cal lle temos moito cariño.

Agora Salcedoteca xa non está soa, ten ao seu irmá Oñitram e entrambos converteranse na voz do centro para dar a coñecer todo aquilo que se vaia realizando tanto na Biblioteca como nas actividades que se programen para a normalización do galego..

Se o queredes visitar podedes atopalo neste enlace:



martes, 21 de outubro de 2008

II Encontros de Bibliotecas Escolares



Un ano máis o CEIP San Martiño estivo presente o venres 17 e o sábado 18 na celebración dos II Encontros de Bibliotecas Escolares, en Santiago.

Foi un acontecemento dobremente importante para nós, posto que ademais de ter a oportunidade de coñecer o traballo doutros centros de Galicia en materia de dinamización de Bibliotecas Escolares, sentímonos orgullosos de que San Martiño fose un dos centros elixidos pola Asesoría para facer unha ponencia sobre os nosos proxectos: a exposición que ofrecemos en Santiago tivo un gran aceptación entre os participantes e estamos satisfeitos de poder contribuír así aos paneis de experiencias que se compartiron con tod@s.

Cremos que eventos coma este serven para enriquecer e reforzar os proxectos, que dende os centros educativos se están levando a cabo co apoio da Consellería de Educación.

Vai dende aquí a nosa noraboa aos compañeiros e compañeiras que, co seu esforzo diario, fan que Galicia sexa neste momento un referente dentro das comunidades autónomas, no eido das Bibliotecas Escolares.



xoves, 16 de outubro de 2008

¡Xa estamos en marcha!

Exposición "Historias de amor"

A nosa Biblioteca xa está en marcha un ano máis para ofrecer aos alumnos non só as novas adquisicións en literatura infantil e xuvenil, senón tamén para dinamizar os traballos da aula a través dos proxectos que ten programados para este curso.

Comezamos agora en outubro co estudio dun tema que vai a servir tamén para participar no Salón do libro do Concello de Pontevedra, que leva por título "As historias de amor na literatura". Temos preparada unha exposición na Biblioteca e realizamos a semana pasada "A Semana do cine das historias de amor".

Aquí van unhas cantas imaxes de como estamos vivindo estes eventos.

venres, 11 de xullo de 2008

Festival fin de curso

¡Vaia festival o deste ano!

Disfrutamos de momentos moi fermosos: rimos, bailamos, cantamos, fixemos teatro... e ata choramos despedindo aos alumnos que se van para o Instituto.

Seguro que eses momentos vividos por todos quedarán nas nosas memorias por moito tempo.
Aquí en Salcedoteca deixamos testemuña desta " festa despedida" coas seguintes imaxes:

mércores, 9 de xullo de 2008

Excursión fin de curso: Allariz

Rematamos o curso visitando Allariz: todo nos resultou moi interesante.

Estivemos no Parque Natural de O Rexo, na parroquia de Requeixo e pola tarde tivemos a oportunidade de ver como funcionaba por dentro un muíño antigo e coñecer o Museo Galego do Xoguete.

Pasámolo estupendamente. Aquí queda esta pequena reportaxe fotográfica para que o vexades...

Coñece a túa cidade

Os alumnos de Educación Infantil participaron no 3º trimestre nunha actividade, organizada polo Concello de Pontevedra, que tiña como obxectivo dar a coñecer aos máis pequenos a súa cidade: Pontevedra.
Aquí quedaron para o recordo unhas cantas imaxes desta saída.

luns, 19 de maio de 2008

A illa dos tesouros

A illa dos tesouros é un caderno de bitácora que trata de reflectir a aventureira travesía polos mares da realidade e da fantasía que realizaron os rapaces e mestres do CEIP San Martiño durante o primeiro trimestre do curso 2007-08.

Nesta historia cóntanse cousas que pasaron na realidade e outras que non son de todo certas; aparecen piratas e animais fantásticos; teñen lugar batallas navais e viaxes submarinas... E ademais amósanse imaxes desta fantástica viaxe e dos traballos realizados polos nosos alumnos dentro do proxecto dedicado ao mar.

Abordade este libro como piratas da lectura e atoparedes tesouros inesperados que vos enriquecerán para sempre.


sábado, 17 de maio de 2008

Día das Letras Galegas 2008

Hoxe, 17 de maio, é una data con nome propio, o nome de Xosé María Álvarez Blázquez, autor homenaxeado no Día das Letras Galegas 2008.



Defensor da lingua e a cultura galegas, membro da Real Academia e fundador de editoriais, Xosé María Álvarez Blázquez foi non só un creador de literatura galega senón que tamén creou canles para que outros escritores e escritoras puidesen publicar a súa obra.


Convidámosvos a coñecelo a el e á súa obra visitando algún dos enlaces que figuran a continuación:

Seminario Galán --------------------- Vieiros --------------------- Real Academia Galega


Xornada de xogos tradicionais

O venres, 16 de maio, na véspera do Día das Letras Galegas, celebramos unha xornada de xogos populares na que participaron todos os alumnos do colexio.


A corda, os aros, a chave, a petanca, os bolos, a rá... roubáronlle por un día o protagonismo aos libros e serviron para que os nosos alumnos e alumnas coñecesen uns xogos e deportes que son parte integrante do noso patrimonio cultural e que esperamos que volvan a formar parte do seu tempo de lecer.

Xornada de xogos tradicionais (Clicar na imaxe para ver as fotos)


Dende este blog, queremos expresar o noso agradecemento ao Departamento de Normalización Lingüística do Concello de Pontevedra, que subvencionou esta xornada de xogos tradicionais dentro do seu programa "Maio, mes da lingua".

Hoxe fomos ao Correlingua

Martes 13 de maio.


Os alumnos e os profes de Primaria fomos hoxe a Pontevedra a participar no Correlingua, unha “marcha” popular na que se trata de animar aos participantes, máis de 2.500 este ano, a falar en galego. O lema deste ano foi: “365 días. En galego cabe todo”.


Debido á chuvia, os actos trasladáronse desde as rúas da cidade ao recinto feiral, onde os cabezudos, os gaiteiros, os malabaristas e o Xabarín nos fixeron cantar, saltar e bailar, e pasar uns momentos de diversión inesquecibles.


Ánimo, e a falar na nosa lingua!!!


Correlingua (Clicar na imaxe para ver as fotos)

martes, 13 de maio de 2008

Os avós faláronnos dos seus oficios

Ademais da participación nos obradoiros artesanais as nenas e nenos de Educación Infantil recibiron ao longo da semana unha serie de visitas moi especiais. As avoas e os avós viñeron ao colexio e contáronnos como eran os seus traballos.
  • 28 de abril: Dna. Juana España (avoa de Damián), ama de casa .
  • 5 de maio: D. Juan Peón (avó de Felipe), tipógrafo; e D. Antonio Abellón (avó de Mireya), urdidor en fábrica de seda.
  • 6 de maio: Dna. Marisol Figueiras (avoa de Diego), mestra; e D. José García (tio-avó de Rosana), electricista.
  • 7 de maio: Dna. María José Barreiro (avoa de David), ama de casa; e Dna. Guadalupe Suárez (avoa de Iván), patronista.
  • 8 de maio: Dna. María Pilar Veiga (avoa de Andrés), modista; e Dna. Dolores Díaz (avoa de Lucía), pantaloneira e costureira.
  • 9 de maio: D. Manuel Amado (tío de Sara), conserxe; e Dna. María del Carmen Gónzález (avoa de Silvia), ama de casa.

Dende Salcedoteca queremos agradecerlles a súa colaboración e a sabedoría que nos aportaron coas súas explicacións.


sábado, 10 de maio de 2008

Semana dos Obradoiros: Venres 9 de maio

O obradoiro de hoxe, venres 9 de maio, foi impartido por Jorge Quintá, pai de dous alumnos do centro, e un dos poucos artesáns do vidro que hai en Galicia. O seu traballo consiste en proxectar, decorar e construír vidrieiras, así como en restaurar as que están en mal estado.

Ao longo da súa ponencia, Jorge mostrounos os materiais que utiliza como materias primas (vidro, plomo, pinturas...), as ferramentas que emprega na elaboración das vidrieiras (cortadores, pinceis...) e o proceso de elaboración das mesmas.

Finalmente, os alumnos e alumnas realizaron cadansúa vidrieira baixo a súa supervisión. Primeiro elixiron un debuxo e colocárono por debaixo do vidro. A continuación, marcaron o contorno do debuxo sobre o vidro con plomo adhesivo. Por último, coloreárono con pintura especial para vidro, obtendo uns resultados tan espectaculares como os que podedes ver nas fotografías.

xoves, 8 de maio de 2008

Semana dos obradoiros: Xoves 8 de maio

O oficio dos oleiros é un oficio milenario, no que homes e mulleres veñen traballando artesanalmente para facer desde utensilios domésticos (olas, cuncas, pratos, xerras…) ata elementos decorativos (figuras, esculturas, colgantes…).


En case todas as comarcas de Galicia hai artesáns do barro, e a nosa cidade non podía ser unha excepción. A Asociación Cultural de Ceramistas Arxilarte de Pontevedra foi hoxe a encargada de impartir un obradoiro de barro aos máis cativos do colexio, desde Educación Infantil de 3 anos ata 3º de Educación Primaria.


Como se pode comprobar nas imaxes, os rapaces de Educación Infantil disfrutaron facendo estampacións e figuras sinxelas, mentres que os nenos e nenas de Educación Primaria confeccionaron cadanseu “maio”.


Lembrar finalmente, que esta actividade está incluída dentro do programa “Maio, mes da lingua”, promocionado e subvencionado polo Departamento de Normalización Lingüística do Concello de Pontevedra.


mércores, 7 de maio de 2008

Semana dos Obradoiros: Mércores 7 de maio

Os alumnos de 3º e 4º de Educación Primaria estudaron durante este trimestre un dos oficios artesanais de máis longa tradición na nosa Comunidade Autónoma, a cestería. Consultaron libros, navegaron por Internet, visionaron vídeos… para buscar información sobre os cesteiros, os materiais que empregan, as ferramentas que utilizan, os produtos que elaboran, etc.


Como remate do seu traballo, montaron unha gran exposición con distintos tipos de cestos, capachos, bolsos, etc. e paneis informativos nos que se explicaba o proceso de elaboración dos mesmos.


Hoxe, mércores 7 de maio, visitounos Pilar, unha cesteira de Marín que non só completou a información que os nenos e nenas recolleran con anterioridade, se non que converteu o comedor do colexio nun taller de cestería no que cada un dos rapaces confeccionou o seu propio cesto, cunha base de madeira e trenzándoo con médula de xunco ou rotén.


martes, 6 de maio de 2008

Semana dos Obradoiros: Martes 6 de maio

Elena Ferro, natural do Concello de Silleda, debe ser unha das poucas zoqueiras que aínda quedan en Galicia, conservando un dos oficios tradicionais, que coma outros, foi case desaparecendo cos cambios dos tempos.

Ela e a súa familia dedícanse a elaborar artesanalmente con coiro diferentes utensilios como bolsos, billeteiras, carteiras… e por suposto zocos e zocas, que segundo puidemos comprobar non son o mesmo. Participa en moitas feiras e mostras de artesanía por toda a Comunidade, amosando e tamén vendendo a quen queira os produtos da súa propia elaboración.

Este primeiro martes de maio tivemos a sorte de contar coa súa presenza aquí no CEIP San Martiño. Elena improvisounos un pequeno taller de zocos e ilustrounos coas explicacións sobre a súa elaboración, emprego, cambios que sufriron ao longo da historia…

Dende Salcedoteca deixamos testemuña desta actividade e ademais volvemos a aproveitar a ocasión para agradecer ao departamento de Normalización Lingüística do Concello de Pontevedra, que colaborou connosco na organización desta semana de obradoiros, subvencionando algúns dos talleres que coma este se están a celebrar.

luns, 5 de maio de 2008

Semana dos Obradoiros: Luns 5 de maio

Hoxe recibimos a visita de tres representantes da Asociación de Palilleiras "A Fieitiña" de Monteporreiro. Ao longo da mañá os alumnos do centro non só puideron admirar a destreza destas artesanas, se non que tamén tiveron a ocasión de converterse por un día en pequenos aprendices de palilleiros e palilleiras. Ademais puideron disfrutar dunha magnífica exposición de encaixe de bolillos con traballos feitos por distintos membros da asociación, que poderá ser visitada ao longo desta semana en horario lectivo por todos os integrantes da comunidade escolar.


Desde aquí queremos expresar o noso agradecemento á asociación "A Fieitiña" por dar a coñecer aos nosos alumnos o mundo dos bolillos e as múltiples aplicacións do seu traballo e por promocionar esta artesanía tradicional con tanto entusiasmo e dedicación.

sábado, 26 de abril de 2008

Semana dos obradoiros artesanais

Dentro do conxunto de actividades programadas no terceiro trimestre en torno ao tema central dos oficios tradicionais, vaise a desenvolver entre o 5 e o 9 de maio a “Semana dos Obradoiros Artesanais”. Esta actividade ten como obxectivo principal o de achegar aos nosos alumnos á práctica cotiá de algúns dos artesáns estudados por eles nas aulas. Este achegamento fundamentarase en primeiro lugar en exposicións temáticas de cada un dos oficios estudados, nunha segunda etapa nas explicacións e demostracións realizadas polos propios artesáns, e finalmente na elaboración de sinxelas pezas por parte dos alumnos participantes nos obradoiros. O programa de actos da Semana é o seguinte:

  • LUNS, 5 de maio: Palilleiras.
    * Exposición de encaixe.
    * 10:30 – 12:00: Sesión práctica de palillar.
  • MARTES, 6 de maio: Zoqueira.
    * Exposición de produtos.
    * 10:20 – 13:30: Proceso de elaboración das zocas.
  • MÉRCORES, 7 de maio: Cesteira.
    * Exposición de materiais e produtos de cesteiría.
    * 10:30 – 14:00: Materiais e técnicas de elaboración e obradoiro práctico.
  • XOVES, 8 de maio: Obradoiro de barro.
    * Exposición de obxectos barro.
    * 10:00 – 14:00: Explicación e traballo práctico con barro.
  • VENRES, 9 de maio: Vidrieiro.
    * Exposición de materiais e produtos.
    * 10:00 – 12:00: Charla informativa e sesión práctica de decoración de vidro.

No apartado de agradecementos hai que destacar a colaboración tanto económica como organizativa proporcionada por parte do Departamento de Normalización Lingüística do Concello de Pontevedra, que foi fundamental para poder levar a bo fin este ambicioso proxecto, sen esquecernos tamén do inestimable apoio recibido por parte do profesorado e da ANPA do centro.

IV Semana da Lectura: Venres 25 de abril

O derradeiro día da semana comezou coa actuación dos nenos e nenas de 1º de primaria que, vestidos de campesiños, fixeron unha magnífica lectura en verso do tradicional conto da leiteira.


A continuación, os rapaces e rapazas do grupo de teatro de actividades extraescolares do centro sorprendéronnos cunha orixinal posta en escena do conto “Zapateiro, aos teus zapatos”.


Como peche da IV Semana da Lectura contamos coa participación do actor Manuel Solla e o seu grupo, que nos ofreceron un espectáculo no que se mesturaba a maxia, a música e o teatro, e buscaba en todo momento a participación dos asistentes.


E así rematou unha semana chea de lecturas, actuacións e escenificacións; de contos, poesías e adiviñas; de ilustracións, música e bailes; de entretemento, sorpresas e risas, que nos deixou cun sabor de boca tan agradable que non nos queda outro remedio que tratar de superarnos de cara a V Semana da Lectura do ano próximo.



IV Semana da Lectura: Xoves 24 de abril

Nos libros todo é posible, e os alumnos de 3º de primaria contáronnos como Mambrú, despois de volver da guerra, se converteu nun cociñeiro de deliciosos perfumes que deixaron o seu recendo entre o público que abarrotaba a sala.


E como unha parte importante dos libros son as súas ilustracións, contamos coa presenza de Abraham Carreiro, coñecido ilustrador, que nos explicou os segredos do seu traballo e agasallou aos asistentes con debuxos dos seus personaxes máis coñecidos.



IV Semana da Lectura: Mércores, 23 de abril

A celebración do Día do Libro estivo protagonizada polos máis pequenos e polos maiores do colexio. Os cativos de 3 anos explicáronnos como se fai un delicioso postre, o pastel de limón con perlas de chocolate. Fixérono tan ben, que cando o pastel saíu do forno daban verdadeiras gañas de meterlle o dente.


A continuación, os alumnos de 6º, cunha acertada mestura de lectura e escenificación, remataron o conto “O trevo de catro follas”, iniciado dous días antes. Este conto ten o extraordinario valor de ser escrito por eles, ser eles os protagonistas directos da historia e ser tamén eles os que o leron e o puxeron en escena.


IV Semana da Lectura: Martes 22 de abril

Continuou a festa o martes cos alumnos de 2º de primaria, que nos acercaron ao traballo dos meleiros e nos fixeron rir cunha divertida e variada colección de contos populares.


O acto continuou cos nenos e nenas de 4º de primaria, que a través das súas “adiviñas dos oficios” fixeron participar activamente ao público, que demostrou o seu coñecemento do tema acertándoas todas sen excepción.


Volveron a rematar as lecturas os alumnos de 6º de primaria que leron a segunda parte do conto “O trevo de catro follas".